აკონკაგუა


აკონკაგუა. სამხრეთ ამერიკის უმაღლესი მწვერვალი (6 926 მ). მდებარეობს ანდებში, არგენტინის  ტერიტორიაზე. სიმაღლით მხოლოდ აზიის მწვერვალებს ჩამორჩება. აკონკაგუა ინკური სახელწოდებაა და “თეთრ გუშაგს” ნიშნავს. ვარაუდობენ, რომ კოლუმბისა და ესპანელი  კონკისტადორების გამოჩენამდე ინკები ასული იყვნენ ანდების ასამდე მწვერვალზე, მათ შორის აკონკაგუაზე (მათს კვალს ამ მწვერვალის ფერდობებზე, 6600 მეტრის სიმაღლეზე მიაგნეს). აკონკაგუა პირველად დალაშქრეს 1897 წელს. მწვერვალზე პირველად ფეხი შედგა ინგლისელი ედვარდ ფიცჯერალდის ექსპედიციის შვეიცარიელმა გიდმა მატიას ცურბრიგენმა. იმ დროს აკონკაგუა შვიდიათასიან მწვერვალად ითვლებოდა, ცურბრიგენი კი – შვიდიათასიანზე პირველამსვლელად.
საქართველოდან აკონკაგუაზე პირველი ავიდა გია თორთლაძე (1996 წელს, რუსეთის ცხრაკაციანი ექსპედიციის წევრებთან ერთად) . ეს მწვერვალი 2002 წელს დალაშქრა ბენო ქაშაკაშვილმა, 2004 წელს კი - ბიძინა გუჯაბიძემ (რუსეთის ექსპედიციის შემადგენლობაში).

დატოვეთ კომენტარი